vo jo ham me.n tum me.n qaraar thaa
tumhe.n yaad ho ke na yaad ho
vahii yaanii vaadaa nibaah kaa,
tumhe.n yaad ho ke na yaad ho

vo naye gile voh shiqaayate.n,
vo maze maze kii hiqaayate.n
vo har ek baat pe ruuThana
tumhe.n yaad ho ke na yaad ho

kabhii ham me.n tum me.n bhii chaah thii,
kabhii hamase tumase bhii raah thii
kabhii ham bhii tum bhii the aashanaa,
tumhe.n yaad ho ke na yaad ho


vo jo lutf mujh se the peshatar,
vo qaram ki thaa mere haal par
mujhe sab hai yaad zarraa-zarraa,
tumhe.n yaad ho ke na yaad ho

koii baat aisii agar huii,
jo tumhaarii jii ko burii lagii
to bayaa.N se pahale hii bolanaa,
tumhe.n yaad ho ke na yaad ho


jise aap ginate the aashanaa,
jise aap kahate the baawafaa
mai.n vahii huu.N 'momin'-e-mubtilaa,
tumhe.n yaad ho ke na yaad ho